Owerspel of egbreek is seks buite die huwelik.
God verbied dit in die Tien Gebooie (Ex 20:14).

Koste word nooit bereken wanneer owerspel sy loop begin neem nie.
Die mens wat verdiep in die hipnotiese spel van verleiding, gaan deur ‘n hele
proses voordat sonde tot volle ontwikkeling kom.

Die benewelingskrag van euforie trek so ‘n digte sluier oor alle objektiwiteit,
sodat die intelligentste mens en selfs die gelowigste Christen, total verblind
oorgee aan hierdie duiwelse krag.

Spreuke 7:1-27 lewer ‘n baie goeie uitbeelding daarvan:
21 “sy het hom verlei deur haar baie mooipraatjies, deur die gladheid van
haar lippe het sy hom verlok.
22 Hy loop skielik agter haar aan soos 'n bees wat na die slagpaal gaan, en
soos voetboeie wat dien tot tugtiging van die sot,
23 totdat die pyl sy lewer splits; soos 'n voël haastig na die vangnet vlieg —
sonder om te weet dat dit ten koste van sy lewe is.
27 Haar huis is weë na die doderyk, wat afdaal na die kamers van die dood”.
Die man of vrou wat owerspel pleeg, is op ‘n pad van die dood.

Daar is nooit ‘n vooraf besef van die onberekenbare skade aan jou huwelik,
gesin en goeie reputasie nie.

Twee ontroue mense werp ‘n doodskaduwee oor soveel onskuldiges: Beide
se huweliksmaats, kinders, kleinkinders, ouers, skoonouers en vriende.

Owerspel bring ‘n doodskauwee wat lank sal hang in ‘n paar huise, waar baie
verwondes in ‘n stryd van verwarring, verbittering en gebrokenhied sal
verkeer. Eens rustige huise sal meteens val deur die
vernietigende orkaan winde van owerspel.

As ons maar net kon besef, dat die onberekenbare skade deur owerspel,
boonop sy pynlike vertrekpunt gaan he by die oortreder se eie lewe, sal daar
moontlik makliker afgesien word, maar mense glo altyd die demoniese leuen
dat hul saak waterdig is:
“Hy wat owerspel pleeg, is sonder verstand; hy wat sy eie lewe wil verwoes,
hy doen so iets;
slae en skande sal hy kry, en sy smaad sal nie uitgewis word nie” (Spr 6:32-
33).
Hierdie is ‘n jarelange marteling wat volg op die voetspore van die
owerspelige.

SIEN GOD OWERSPEL OOR?
Alhoewel die wereld van vandag elke soort perversie en opstand teen God se
gebod aanmoedig, en die kerk skaars ‘n mening mag waag, is die Woord baie
duidelik oor God se gedagte rondom owerspel (1 Thess 4:3-6).

3 “Want dit is die wil van God: julle heiligmaking; dat julle jul moet onthou van
die hoerery;
4 dat elkeen van julle moet weet om sy eie vrou te verkry in heiligheid en eer,
5 nie in hartstogtelike begeerlikheid soos die heidene wat God nie ken nie;
6 dat niemand sy broeder in hierdie saak moet bedrieg en benadeel nie,
omdat die Here 'n wreker is oor al hierdie dinge, soos ons aan julle ook
vantevore gesê en betuig het”.

In die Ou Testament al, het God in die Tien Gebooie Sy verbod op
egbreek/owerspel uitgespreek. Die doodstraf was opgele vir skuldiges.
En nou hier in die Nuwe Testament, selfs onder Sy genadeverbond, is Sy
afkeur steeds duidelik, deur die waarskuwing dat Hy owerspel sal straf.
God is egter bereid om ons ook hierdie sonde, op grond van Christus se
soendood, te vergewe – as ons berou toon en die sonde bely en laat staan.
“Hy wat sy oortredinge bedek, sal nie voorspoedig wees nie; maar hy wat dit
bely en laat staan, sal barmhartigheid vind” (Spr 28:13).

VERGIFNIS
Vir heling van ‘n huwelik en ‘n huisgesin, is vergifnis die vertrekpunt.
Eerlike en berouvolle belydenis teenoor God, jou huweliksmaat, en alle ander
betrokkenes wat verwond is, moet geskied, om die proses van genesing aan
die gang te sit.

“BELY mekaar julle MISDADE en bid vir mekaar, sodat julle GESOND kan
word” (Jak 5:16).

Vergifnis kom ook nie maklik nie. Dit word voorafgegaan deur skok, verwyte,
diepe seer, depressie, ensomeer, en eers nadat die verontregtes weer hul
geestelike en emosionele balans gevind het, word vergifnis ‘n groter
moontlikheid.

God sal heel maak – genesing van stukkende huwelike en lewens is waarlik
moontlik. Almal sal egter geduldig moet wees in hierdie proses van genesing,
wat gewis nie oornag plaasvind nie.

Dit is ook belangrik om te onthou om jouself ook te vergewe.
“Welgeluksalig is hulle wie se ongeregtighede vergewe en wie se sondes
bedek is” (Rom 4:7).