God tel mense op wat laat val is op hul lewenspad.
Een van die goeie voorbeelde daarvan, word omskryf in 2 Samuel 9:1-13.
Koning Saul en sy seun, Jonathan, was dood. Dawid het die troon bestyg, en
later besluit om guns te bewys aan enige oorlewende nakomelinge van die
afgestorwe koning Saul.

Iemand het toe gemeld dat ‘n kleinseun van koning Saul nog lewe, en dat hy
lam is aan altwee voete. ‘n Diensmeisie het tydens ‘n veldslag hierdie
vyfjarige jong seun opgeraap, en terwyl sy met hom vlug, het sy hom laat val
– vandaar was hy lam aan sy voete.
Die seun se naam was Mefiboset, wat “skande” beteken. Lam aan albei
voete, omdat hy laat val is.

Daar is vandag baie Mefibosets – mense wat laat val is.
Hulle is laat val deur dinge soos huweliksontrou, egskeiding, verraad van ‘n
beste vriend, mediese nalatigheid, teleurstelling en allerlei lewenskrisisse.
Hierdie Mefibosets beleef dan ook ‘n lamheid, wat eerstens vorm aanneem by
die selfbeeld. In 2 Sam 9:8 noem Mefiboset homself juis ‘n DOOIE HOND!
Dit is ‘n lamheid wat dikwels deurdring deur na die geloofsvertroue, rigting,
hoop en ‘n toekoms.

Dit is in hierdie gebroke omstandighede, dat mense verleentheid of skande
beleef, eie aan Mefiboset se naam.
Koning Dawid het Mefiboset laat haal. Hy het gewoon in ‘n plek met die naam
Lodebar, wat “sonder weiveld” beteken.

Weliswaar het Mefiboset niks gehad nie. Behalwe dat hy lam was aan albei
voete, het hy ook nie sy eie “weiveld” van lewensbestendigheid en
vooruitgang in sy lewe geniet nie. ‘n Mens kan verstaan dat hy soos ‘n dooie
hond gevoel het!

Hy sou egter ontdek met watter groot verrassing God hulle besoek, wat laat
val is in die lewe. Daar was groot guns en genade oppad vir Mefiboset!
Koning Dawid het hom in sy paleis geneem, en hom begunstig met grond,
koringlande, wingerde en diensknegte. Sy lam voete is ingestoot onder die
tafel van ‘n koning, en hy sou die res van sy lewe wonderlik versorg wees.
Dit is wat God kan doen vir die Mefibosets wat laat val is.

God is die God van herstel, die God van die toekoms.
Hy herstel die naam van die vernederde, en gee weer ‘n eervolle erfenis.
Hulle wat laat val is, kan waarlik glo in God se guns en genade – en bid
daarvoor!

Maak die volgende teksverse jou eie:
“Wees nie bevrees nie, want jy sal nie beskaamd staan nie; en vrees geen
skande nie, want jy sal nie nodig hê om te bloos nie; maar jy sal die skande
van jou jonkheid vergeet en aan die smaad van jou weduweeskap nie meer
dink nie” (Jes 54:4).

“In plaas van julle skande ontvang julle 'n dubbele deel….” (Jes 61:7).
Dit is wat met Mefiboset, asook Job gebeur het. Dieselfde kan vir jou gebeur!
Vertrou die Here daarvoor.